【西西得西，定律嚟架嘛】
噚日提到"HR平時都受埋唔少氣"之後，有網友問:「乜HR都有氣受架咩? 」梗有啦，其實HR只係爛頭卒，行出嚟受靶架咋，真正嘅西人咪又係背後啲老闆同Department Head，日日受氣所以正正得個負、負負又得個負，然後就西西得西囉，喺濃烈嘅西方文化薰陶下，有乜辦法唔變埋西人吖。
我同事粗口Kitty就係人辦，佢之前喺一間上市公司做HR，公司主要業務係時裝，所以長期要請Merchandiser，康仔曾經唔識死咁樣質疑粗口Kitty:「唓，呢啲職位好易請啫，又唔係每個月都有人走?」
粗口Kitty:「唔係每個月都有人走? 我哋公司係日日都有人Resign呀！」
康仔:「咁嚴重?」
粗口Kitty:「啲Department Head痴L線架，但凡早過佢走嘅下屬都會喺第二日俾佢鬧，問人點解咁早放工，屌那媽，你兩袖清風啫，人哋有老婆仔女架，走嗰陣都夜晚9點啦，仲話人早走！」
康仔:「咁又幾難頂喎。」
粗口Kitty:「呢啲都係碎料，我公司嘅Deparment Head係會大大聲當住全部人面前鬧個下屬，喂，邊個會受呢一套呀?」
康仔:「咁咪好多人做幾日就走?」
粗口Kitty:「最短紀錄係做半日辭職，呀，唔係，嚴格嚟講係冇辭職，有條女朝早返工見到成個office都冇人講嘢，個個好似死老竇咁，Lunch拎袋出去食飯就冇返過嚟，後尾call佢，佢話以為自己做緊圖書館管理員，啲氣氛勁怪，都係唔做喇。」
康仔:「哈哈，好在市場都多Merchandiser。」
粗口Kitty:「多有L用呀，香港如果有10萬個Merchandiser，我諗有9萬個都上過嚟見工，得萬幾蚊人工，又要英文嘞嘞聲，又要任勞任怨，又要識擦鞋，最好笑係要搵啲工作積極嘅人，但又唔想人哋太有野心，係咪OnL9架，即係要搵條友全心全意幫你做嘢兼日日朝9晚9，不過唔奢望加人工同埋升職。」
粗口Kitty補充:「其實公司個名喺行內已經臭晒，自己而家做Headhunter，先知舊公司已經被唔少Merchandiser black list咗，聽到佢舊公司個名，寧願繼續失業都唔肯去見，以前日日俾啲Department Head打內線嚟追，質疑點解仲未請到人，其實請唔到人嘅最大原因，咪就係因為個Department Head仆街囉，不過佢自己唔知衰架，永遠將責任推喺HR同啲員工身上。」
HR咁重怨氣，斷估唔係365日都嚟M嘅，每個HR初出茅廬嗰陣，都會有一顆熱血嘅心，只係唔知何年何月突然被摧毀咗啫，而令到HR日日想殺你全家嘅源頭，9成都係來自佢哋公司嘅老闆同埋Department Head，都係嗰句，西西得西，老闆西，公司西，公司西，經理西，經理西，HR西，HR西，請嘅人就自然西，好人就Resign，西人就留低，咪全公司一齊西囉，即係鹹酸菜炒牛歡喜咁，定律嚟架嘛。
Search